Travel Reports
Trekmento den e region di Himalaya
Jega Everest Base Camp ta pa esunan cu ta gusta aventura un tiki extremo
Nos tur dos, Dino y Jedric (tata(45) y jiu(16)), ta gusta combina naturalesa y ejercicio. Riba Aruba casi no tin mondi cu nos no a cana aden. Un challenge nobo tawata hasi falta. Mescos ta conta ora di bai cu vakantie afo. Entre otro, luganan friw manera Noorwegen, desierto (Egypte), jungla (Suriname) y verre-oosten (China) ya nos conoce. E pregunta tawata ta: “Unda awo?”
Nos a bin realiza cu caminda nos wak un sero, hopi biaha nos ta busca pa subi’e. Mayoria seronan na Aruba nos a subi. Gewoon pa smaak; pa keiro; pa ta ‘in the move’! St. Cristoffel (Corsow), Brandaris (Boneiro) y Sta. Ana (Punto Fijo) tambe ta forma parti di e esunan cu nos a subi caba. Asina a bin na e idea: “Mount Everest”.
Yega top di Mount Everest tin su exigencianan cu no tawata necesario pa nos. Nos a scohe pa trek den e region cual ya ta bastante exigente caba.
Nos tin dos tempo cu vakantie grandi: juli y december. E miho tempo pa bishita Himalaya ta april-mei y october-november. Den juli awa ta jobe djie hopi ey cu no ta vale la pena. December si ta brinda un posibilidad. Aunque e chance pa mist y sneeuwstormen tei. A keda nos pa scohe pa december.
Nos a cumpra ticket na Maduro Travel y a bula Aruba-Amsterdam; Amsterdam-New Delhi (India); New Delhi-Kathmandu (Nepal); Kathmandu-Lukla(pueblo cu vliegveld mas serka di e seronan posibel).
Nos trekmento tawata di total 12 dia. Nuebe (9) dia subiendo, di cual dos (2) dia tawata pa acclimatiza y tres (3) dia pa baha bek.
Nos a cuminsa trek saliendo for di Lukla (haltura 2840m). Bo ta cana den un vaje. Abao aya un rieuw ‘blanco’, awa blauw-berde cla-cla, ta compañabo henter e ruta te final. Na cuminsamento bo ta cana den mondinan cu hopi matanan berde. Entre otro pinonan halto. Bo ta cruza e vaje di un banda pa otro riba differente brugnan cologa masha halto mes. E padnan ta halto y ta pasa rand-rand di e seronan. Bo ta pasa na differente pueblonan.
Banda di 4000m di haltura e ambiente ta cambia bira alpino. Matanan ta bira chiquito. Y for di mas o menos 5000m no tin niun mata mas. Ta asina frieuw cu e tera ta parse di hero blanco. Temperatura ta jega -10°C cu solo briando. Eyriba bo ta rondona dor di e montañanan gigante y poderoso. E pieknan ta cubrí cu capa blanco di sneeuw. Un spectaculo maravilloso y sublime di madre naturalesa.
Mainta, prome cos cu e rayonan di solo ta briya ta top di e seronan y consecuentemente anochi ta bai laga esakinan por ultimo.
Na Everest Base Camp (EBC; 5360m) nos a laga bandera di Aruba ta bula.
Dia 25 december, sí Pasco, nos a alcanza e top di nos trekking cu ta e sero di Kala Patthar (5545m). For di eynan nos tawata tin un tremendo vista riba Mount Everest for di hopi serka.
Habitantenan ta transporta nan productonan den macuto riba nan lomba of nan ta hasi uso di ‘jopkyoks‘ of ‘yaks‘ . Increible pa wak con tin di e ‘porters‘, en general hendenan flaco, chiquito, jong y bieuw, por carga mas cu 100 kg.
E hendenan ta humilde y religioso. Cada pueblo tin un Stupa (boeddhistisch). Nos a custuma drei ‘prayer wheels’ cada biaha cu nos pasa banda di nan. Na caminda bo ta pasa hopi piedranan cu oracion ribanan graba: Piedran di Mani.
Nos por a bishita Monks y Nons den Monasterionan y observa nan ritualnan.
Nos a keda den lodges. Menunan ta sorprendente: international.
Y awo parti di e aventura mes-mes. Den camber no tin verwarming/kachel y temperatura ta ± -10°C paden. Mester conta riba paña diki y un bon slaapzak. Awa ta vries. Bañamento ta minimo. Awa potabel ta wordo purifica cu tabletnan pa evita diarrhea. Nos a bebe hopi te cayente. Mester tene cuenta cu e aire delega y duna curpa chance pa custuma. Masha halamento di rosea mes pa move djies un tiki. Un guia y un porter a compañanos. Ora di subi nos a cana un pormedio di ± 5 ora/dia; ora di baha 7 ora/dia.
Un trekmento asina por ta extremo pa un hende y pa un otro no. Ta bon pa ta fysica- y mentalmente prepara. Pa nos e tawata net e challenge cu nos tawata busca pa awo. Sufficientemente spannend. Un avontuur di bida. Nos ta hopi contento di a logra nos meta. E naturalesa ta sumamente bunita, exotico y e cultura interessante.