Travel Reports
Fin di siman na Academy Hotel Curaçao
For di e momento cu mi a lesa den corant referente e hotelvakschool na Corsow esaki a yama mi atencion. Academy Hotel Curaçao y m’a pensa, e prome oportunidad cu ami y mi casa tin, nos ta bai dal un buelta aya banda. Nos a dicidi di bai e fin di siman di 20 di maart. Mi a bai riba nan web site. Segun nan informacion e tin 46 camber, single, double, suites y cada un ta diferente. E mesun dia mi a yama na telefon y ya for di eynan caba mi por a sinti cu nan servicio ta excelente. E persona na telefon tawata hopi amabel y mi a hanja contesta e mesun dia riba e mail cu mi a manda. E camber tabata confirma y nos tabata cla pa bai Corsow y pasa un fin di siman diferente. Locual tabata falta tabata e ticketnan di avion. Pa esaki Carla di Maduro Travel a zorg. E Academy Hotel ta den pleno Punda Prinsenstraat.
Nos a yega diabierna anochi y na e front desk nan a atende nos na un manera super special. Nos a subi bai pa nos camber lihe lihe ya cu riba diabierna tin Happy Hour y nos kier a probecha e ultimo minuutnan di esaki. Nos camber y baño hopi espacioso. Un King size bed, flat screen, lessenaar, stoel etc. Nos a keda encanta cu e limpieza. E mainta siguiente ora nos a sali for di nos camber ya tabatin un grupo ta haciendo e cambernan limpi. Mi no sa cuanto biaha nos a debolbe e saludo “bon dia señora”, “bon dia meneer”. E desayuno ta inclui den e prijs. Un schaal pa cada un cu diferente beleg, un schaal cu manteca, muisjes y jam. Tambe un basket cu diferente tipo di pan. Koffie y juice. Como e hotel ta keda den Punda e fin di siman a bira uno di cana rond, wak e tiendanan, cumpra algun cos, cana bai Otrabanda, sinta den e diferente cafenan na Handelskade, bishita e hotel nobo di Renaissance of lunch den e restaurant mes di e hotel. Nos a pasa un dushi fin di siman. Nos a relax y a disfruta di e excelente servicio di e hobennan cu ta studiando “on site” na Academy Hotel Curaçao cu mi ta recomendabo ampliamente.
Bishita nan web site y lo bo hanja mas informacion di e hotel aki cu ta den un edifio historico y recien remodela di Corsow. Na e hobennan cu a percura pa nos pasa un fin di siman inolvidable, danki y hopi exito den boso estudio!